حياه اخري......BACK

إنتهت آخر كلماته
...بالنسبه لي...
واستطعت اخيرا رثاءه
سطوري اليك تختفي
كلماتي........
اليك اذكرها
تملؤها حياه
فتملؤني حياه
من حياتها
اذكر ايضا يوم احتضارها
كان فجأه
علي الاقل بالنسبه لي
فصارت تضعف وتضعف الي ان ماتت
ماتت بداخلي
رغم ذلك كانت لي حياه اخرى
حقا ليس لها الوان الاولي
ولكنها حيا اظنها الان رائعه
فلم افقد فيها الا شعورا واحد
وبها ذكريات
لرفات سطور حكايه
لن اظنها ستظل كثيرا
فمازالت الرياح تذروا بقايا رفاتك من داخلي

أخيرا رمضان جه....درجن درجن وأترمضن

كل سنه والامه الاسلاميه كلها بخييييير

ويارب يعود علينا دايما بالخير

شايفين يا جماعه كميه المسلسلات اللي شغاله

تقريبا خمسه وعشرين مسلسل

يعني عاوزين نمد اليوم ساعه كمان عشان نلحق نكملهم

المهم

يارب

نكمل كده مبتعدين عن التليفزيون ع أد مانقدر طول الشهر

وننفذ الخطط اللي مجهزينها لاستغلال رمضان

ومنضعفش





البرامج الدينيه بجد جامده

برنامج ارض الانبياء ع الحياه

مش ممكن يفوتك حاولو تشوفوه بجدددد جامد

والرائع معز مسعود و الطريق الصح

يوميا الساعة الخامسة عصرا بتوقيت القاهرة على القناتين الأولى المصرية و المحور

و يعاد بثه على قناة المحور الساعة الثامنة و النصف مساءا

و الاعادة الثانية الساعة الثالثة و النصف صباحا بتوقيت القاهرة

بردو

والباقي لسه هتابعهم واقولكو

طبعا كميه برامج مناقشه مسلسلات

كميه مهوله بجد


وخناقات والبطلات ضحك وغنا للصبح
والنقاد نازلين سلخ ف المخرجين

(دا مسلسل زباله يا راجل دا وش البطله ف المسلسل كان شبه وش رجلك

:::والمخرج

ايه وش رجلي وانت شفت وش رجلي فين هوه انتا كنت بتصلي جمبي الجمعه....تيييييييييييييييييت....

طبعا مفيش داعي نكمل الحوار ومننزلش للمستوي ده

المهم بس حبيت اقولكو

رمضااااااان كريم ونلتقي بعد الفاصل



وهصوم رمضان يا ولاه درجن درجن



واترمضن درجن درجن دن

خلاص جهزت سحوري درجن درجن

واتسحر

وهجيب الحلو بتاعي

واحلي بعد ما بفطر



وانزل ع الجامع جري

وارجع اكل كنافه



مش عارف تقريبا رمضان مأثر عليا

رمضان كريــــــــــــــــــــم

قصه عشق ونار قايده

حكايه لها بدايه وغايه

ونهايه ابدا مش سهله

نحكيها لا ناقصه ولا زايده

وياريت نطلع منها بفايده

*************
هوه دا قلبو ملان حنيه

بيدي الحب م غير انانيه

نفسه جميله وصافي النيه

ودا رأي البشريه

من أيها جنسيه وفيّه

م الاخر ميه الميه

************
حكايتها جواه مكنونه

هوه مؤلفها وبطلها

بطلتها بنيه شعنونه

ساكنه ف قلبه وعمره ما طالها

***********
سيريتها ف سكوتو وحديتو

عايشه معاه في جميع حواديتو

وصورتها بتتصدر بيتو

وملت كل قلبو و فتافيتو

وتغيب تركبو عفاريتو

وتبان ترجع حيويتو

ويتلخبط لخابيطو

ياريتو ما عشقها يا ريتو

********************************************************

الحـــــب.....إنسانـــــــا

ولد الحب بيننا انسانا

حول دنياي بستانا

لم اعرف له اسما ولا عنوانا

غير انه يعيش من الحب شطآنا

ليست شطآن بحر وإنما شطآن بركانا

بركان حب يبعثرنا

فوق السحاب يحملنا

لنري من السعاده أكوانا

أكوان لحن أشجانا وأطربنا

حتي بلغنا نشوانا

لنحفظ سعادتنا قدمنا أعمارنا قربانا

ولكن كان الليل شيطانا

شيطانا يرصدنا

يراقبنا

يسخر من حكايانا

يهددنا

يؤرقنا

يزلزلنا

ويهزمنا

يطوي صفحتنا وينسانا

لم أعد أري غير بقايانا

وذكري لكل ماكانا

لن انساكي ولن ينسي الحب ذكرانا

وسأظل كراهب في حبك بلا وطن ولا مكانا

.....ولا اقولك بلاش الملامه

اللوم

والعتاب

ده موضوعي انهارده

.....ابتدينا

زاد معايا الموضوع ده أوي ف الفتره الأخيره

كنت أنا غالبا الشخص اللي واقع عليه اللوم

أعدت كده وفكرت وإتأملت ف الماضي

يمكن آخد منه عبره وعظه

إييييييييييييييييييييييييه

والله ياخويا الناس بقت بتلوم أي حد ع أي حاجه

تلاقي كل الناس ف الشغل بيلوموا بعضيهم

تروح تلاقي الراجل بيلوم مراته

ع أي حاجه

ممكن حتي لو ماتقصدهاش

القصد

ان الموضوع ده زاد أوي

دا حتي يا راجل الواحد يصحي يحس انه

مش زمبوط كده

يقولك إيه اصل الجو انهارده وحش

طب إيه اللي جاب دي لدي اهو كده

هوه كده والسلام

انا برضه كنت بعملها

اكدب يعني؟

لا أقول اللي ليا واللي عليا

بس أعدت كده بيني وبين نفسي

لقيت ليا رأي ف الموضوع

اصل هبطله هبطله

فابطله عن اقتناع احسن

انت اما تكتر م عتابك لواحد

بتديله الجرين كارد انه يعرف مواطن ضعفك فين بالظبط

يعرف ازاي يدايقك

وفين يوجعك

مش معني كده نلغي العتاب نهائي

اكيد مش كده

لان طبعا فيه عشم ولو خيّب الواحد بيتدايق

لكن

بحط ف اعتباري

هوه يقصد ولا لا

قاصد يدايقني

يبأه ولا يستاهل عتاب ولا غيره

مش قاصد

اسامحه

طبعا وليه لأ

وبرضه

مش هسيبه مايقصدش كده ع طول

ممكن بنظره بكلمه بأي تصرف توحيله انك متدايق

وتعدي وننساها

اتكررت تاني

احم احم

طبعا انت مهيأ م قبل كده انك تدايق

برضه مش يقصد

هااانعااااديييهاااا

والتلميح هوه ذاته

انك مش مبسوط

ف التالته بأه كررها تاني

يبأه البعيد فهمه تقيل أوي

لا ده يتمسك كده

يتغسل ويتعصر

ويتنفض

ويتنشر كده

ويفهم غلطه

وبرضه هنسامح

هننسي؟؟؟؟

ممممممممممم

لا دي براحتك بأه

بيني وبينكو يا ولاه اما بدأت بقلبي الكبير ده

الحونين ده

اسامح كتير

او بمعني اصح ماشيلش ف نفسي

عدت حاجات كتير سهله ولتشيفه

قبل كده كان ممكن تعكنني

لكن دلوأتشي

بسامح وبنسي

حــــــب مسحـــــــور

كثيرا ما تتخبط مشاعرنا
نعرف الكثير
ونرتاح لهذا ولانرتاح لهذا
نجلس مع انفسنا جلسات
تصارح وتسامح
واعاده ترتيب أوراق
كثيرا ما لا نستطيع تسميه علاقاتنا بالاخرين
تسميه واضحه
لـــــــــــــــــكن هو إن جاء لا نحتاج ان نفكر
لا نحتاج ان نبحث عنه
فهو في داخلنا كشمس
تبعث دفئا في جوانحنا
تشعرنا بالسعاده نلاحظها في بريق عينينا الذي يزيد كل لحظه
تطير مشاعرنا تحت تأثير رفرفـه قلوبنا
هو إحساس انك بعد ان كنت شيء أصبحت كل شيء
وبدونه ولا شيء
ليس عاطفه فقط
بل هو طاقه
تستمد منها الحماس والنشاط
هو عطاء
هو أن تزرع في طريق من تحب ورده حمراء
وفي خياله حكايه رائعه
وفي قلبه نغمات تهتز لها أوتاره
فالحب هو نغم الحواس
هو صداقه
ليست عاديه
فهي صداقه شبت فيها النار
بالتأكيد يختلف عن الصداقه
اختلافه في هذه النار
هو أن ترى فيمن تحب مالا يراه الناس
بإختصار
لا أستطيع تعريفه لأني لم أعشه
أشعر أنه جزيره مسحوره

تحوم حولها أشباح ورديه تكاد تحجب رؤيتي
لا أستطيع سوي أن أدور حول الجزيره الرائعه
بدون أن أهبط فيها
أقدم فقط صوه غائمه
غامضه إلي حد ما حالمه
فهي بها عالم كامل
فيه غني وفقير
سعيد وتعيس

بدونه
فكل الاشياء متساويه

**************

العروسه للعريس .. والجرى للست امينه

م موقعي هذا سنناقش ونحلل ونحاور وطبعا نطلع بنتايج
آه يا ولاه ماحنا بلوجرز والبلوجرز إيه غير شويه مناقشات

وأفكار ف الدماغ
الموضوع بسيط ولطشيف جدا
نتجوز ازاي
صالات وانتريهات وصالونات وبتاع ولا عن حب
الموضوع قتل بحثا مش كده.....
بس لأول مره هدلي بدلوي فيه
استبينا
نمسك واحد واحد نقول رأينا
أولا الجواز عن حب وشوق وهيام واحلام وياسمين ونهي ده
وسهد الليالي ونــاااعـــــم يا حبيــــبي نعم
آآه والدره المشوي ع الكورنيش
وأخوها اللي بيقفشكوا
وبتبقي علقه سخنه
طبعا ده مرفوض
الولد اللي يوافق ع كده عمره مابيوصل لمرحله حدديلي معاد مع بابا

لأ البنت اللي بتوصل لأحددلك معاد مع بابا
وهنا بيبدأ التفكير
أصل البنت دي هوه رخصها طبعا بعد ما هي رخصت نفسها بزياده
مجرد انها تسمح بوضع زي
وتسمحله انو يبأه عارف انها مخبيه ع باباها

ولاطعاه ع قفاه
بترخص نفسها وعيلتها أوي
وعارفين حتي لو اتخطبوا فتره خطوبتهم بتفقد جمالها وكونها أول أحاسيس تتحس كده
وغالبا اربع شهور جواز وبيطلقوا

اه اربع شهور بس

ممكن أكون مع الجواز م النوع ده ف حاله واحده
لو اتنين مثلا طبيعي بيتعاملوا مع بعض

ظروف شغل جيره قرابه الخ

وطبيعي عرفوا بعض بس

أول ما أي حد منهم يحس تغيير من ناحيه التاني ف المشاعر

إن الموضوع بدأ يتغير م معامله عاديه
لا هنا جري ع البيت
كده هيا حافظت ع نفسها غاليه
وهوه حافظ عليها غاليه لأن هيه أصلا غاليه

هنا صدفني اي اعتراض او أي مشاكل هيعرفو ازاي يتغلبوا عليها

هنا لازم نعرف انهم بيشتروا راجل

راجل ع حق ربنا

هيبدأوا يتساهلوا معاه ف حاجات

لأنه زي ما بيقولوا جاي م الباب

هيطبقوا مبدأ إن اهم خمس حاجات ف الدنيا تلاته

الستر والصحه

وبنتهم دلوقتي ف إيد أمينه

آه أمينه دي حماتها أم الواد

وبالنسبه لجواز الصالونات بين مؤيد ومعارض
آآآآآآآآآآآه سيبقي جواز الصالونات مشكله كمشكله الثانويه العامه
كيف لنا ان نضع ضوابط عشان نحكم الليله دي
هوه صح ولا غلط
لا طبعا صح
وهوه الصح بس ازاي
البيه اللي جاي يخطب الانسه
أقل واجب يبأه جاي يخطبها فعلا

مش جاي يعاين البضاعه ويا يوافق يا لا
البنت مش شوال دقيق جاي يعاينه وتلاقي عيله العريس كل واحد بيقوم بوظيفته
مامته ماسكه ودن مامه العروسه المهم تشغلها لاكبر قدر
وباباه ياخد باباها ويطلعو عشان يسيبوا الحريم مع بعضهم اهو العيال يعرفوا يقولوا كلمتين



والبيه يشتغل بأه لف ودوران حوالين الكرسي

وينام تحت الكنبه

ومافيش مانع زغده كده

بالظبط زي ماتكون .......وبيعاينوها قبل ما تدبح

ثانيا جلسه واحده لا تكفي
مره واتنين وتلاته ان شاء الله حتي خمسه وتلاتين
طالما فيه مبدأ القبول يبأه لازم يكون عن اقتناع
وتتوفر الظروف المناسبه اللي تساعدهم الاتنين يوصلوا قرار سليم
مافيش مانع يقعدو لوحدهم
مش خلوه لأ
لا هما في الصالون وبابا وماما ف الانتريه جمبيهم بس يتكلموا يعرفوا بعض

عشان نكون فكره يا جماعه

القرار ده غالبا بيكون مره واحده
طبعا نوعيه الكلام اللي الاتنين لازم يحاولوا يغطوها

كلام عام وده هيقيسو منه ثقافه معرفع وطريقه تفكير

كلام للعريس مزايا عيوبه مرتبه يعني ايه جواز؟ واشمعني دي
والعروسه كذلك
طولت صح
بس لازم ف الاخر لا ننسي
الطيبون للطيبات
وربنا يتمم بخير

لولولولولولولولولولويىىىىىى

....محطه وجع

لحظات عصيبة فعلا

أن تشعر بين لحظه واخرى بالطموح واللحظه التاليه بالاحباط

بعد طول وقوف في محطه انتظار

فعلا احساس بجد صعب

إن لم يكن الاصعب علي الاطلاق الذي مر بي في فترات مماثله

حينما تشعر ان دنياك تضيق بك

لا فقد ضاقت بك فعلا

تريد ان تكون بمفردك

الآن لا تريد ان تري أحدا

اي احد

الان تريد ان تنسحب بنفسك الي حيث لا احد

انت وربك فقط

برحمته

وقدرته

وحكمته

فعلا هي حكمته اللتي لا يستطيع عقلك البشري القاصر ان يفهمها

فهي الخير لك بالتأكيد

واليوم زاد مخزون اعتقاداتي التي اقتنعت بها بعد تجربه
واحده جديده

هي اي حقيقه مؤلمه تواجهنا ليس لها نفس الاهميه كأهميه تصرفك تجاهها

وأيضا

شعرت بدفء من كانوا بجانبي

فعلا

اصحاب بجد

انثي ...في ضل حيطه

سيدتي اولا
مبارك عليكي بيتك وزوجك وولدك
اقدر جدا دورك في بيتك ان كنتي غير عامله
فهي مهمتك الساميه اللتي اصطفاك بها الله
فهي الاسمي علي الاطلاق
واقدرك ايضا ان كنت امراه عامله
فلنا ان نقدر سمو شخصيه قبلت ان تشارك نصفها الاخر في نصفه وتقوم بدورها كاملا
سيدتي
ليس عمل المرأه ما اتكلم عنه
ولكن اسمحي لي ان اقتحم عالمك
لستن كلكن ولكن نموذج نراه كثيرا في حياتنا
تزوجتي
ماذا كان الزواج بالنسبه لكي
هل كان خلقا لحياه
ام وأدا لاحلام
هل لازلت تشعرين كونك امرأه
عذرا ليست امرأه
هل تشعرين انك لازلت كيانا بشري
لازال له حياه له الحق فيها يستطيع ان يحلم
يستطيع اقل تقدير ان يعيش
ام كانت النهايه
هل كانت نهايه القصه ان يحملك فارسك بين ذراعيه علي حصانه الابيض
و
انتهت القصه
واصبحت بعدها مجرد صوره في المراه لانثي طالما عرفتيها
واحببتيها
في خلفيتها الوان احلام لكي
يكاد لونها الورد ان يخبو
فقد بهت حتي انك غير قادره علي تمييزه الازال ورديا ام تغير
اعتلاه لون اهمال
انت فعلا عظيمه
فقد وهبتي حياتك فعلا للاخرين كلها
لدرجه انك نسيتي ان لك جزء منها
اليس لك الحق في جزء منها؟؟
الا تظل مع ذلك حياتك؟
اين ذهبت قدرتك علي الحياه
اين دفنت مواهبك
واين قتلت اطلاعاتك وثقافتك
اين اهتماماتك
اين قدرتك علي اتخاذ قرار
او مجرد دخول مناقشه عاديه
اين حيويتك
بل اين حياتك كلها
ليس تعميما
ولكن نموذج نراه كثيرا
لسيده اقل ما يقال طحنت في حياه
حياه لكي الحق في ان تشركي اسرتك فيها مع كونها حياتك
ولكنك رضيتي ان يعيشوها بدلا عنك
سيدتي
فلتحاولي احياء مادفنتيه
لعل وعسي ان تكون له القدره علي ان يعود
وانت اردتي فاعلمي انه سيكون لك الف قدره

********************************************************************

باااااااااااركووووووووووووولي

********************************************************************

انهارده بدأ دكتورنا احمد الحاج

في التدوين فعلا

استنيت البلوجه دي
فعلا م يوم ما قابلت حضرتك

لكل اللي مشرفني لازم يدخل البلوج دي

ياجماعه دا الفكر الخلاصه م الااااخر

http://futureinourhands.blogspot.com/

دي بلوج دكتور احمد

مش اعلان لان مش انا اللي هعلن طبعا

بس يكون ليا اي شرف في نشر البلوج دي

والفكر ده

تحياتي دكتور احمد

**********************************************************************

ثانيا

الابداع اذا ذكر

ارتبط في ذهني صوره ل(ضيــــــا)

ظهر في صوره اخري

اكثر ابداعا

وهو مبدع دائما

http://abbasofficial.blogspot.com/

كذلك ده مش اعلان

دي مساهمه صغيره للمشاركه ف نشر فكر عن جد

يستاهل تقدير

************************************************************************

وشوشــــــــه

ناس بنحبهم اوي تشاء الظروف اننا نبعد لفتره سواء ظروف عمل او سفر مثلا

من جوانا بنكون بنحبهم جدا

لكن بعد ما نتقابل بعد فتره طويييييله

بنبقي مسبوطين اننا قابلناهم وحاسسين كلام كتير هنقوله



بس فجأه
تحس انك محرج تتكلم

تحس انك..... في حاجه

الكلام ع أد الرد سواء منك او منهم

فيه حاجه بتاعت زمان اتكسرت مش اتكسرت

تقريبا سقطت بمضي المده

تحاول ترجعها بس مابترجعش

مين السبب فيها

بجد ماعرفش

هوه فعلا البعيد عن العين

بعيد عن القلب.؟؟؟؟؟....................

=========================

ناس تكون ولا تعرفهم ولا يعرفوك

واما تقابلهم تحس انك حبيتهم كده بسرعه

تحس دفا كده اول ما شوفتهم

تبقي حاسس انك تعرفهم من زمااان اويىىى

تفتكر هما بيحسوا برضه بكده

اكيد
أصل مش هتبأى انت حاسس أده كده احاسيس جميله

وهما حاسين ب
ولا حاجه

=========================

دول كده كانوا كلمتين ف نفسي قلت اقولهم

غالبا الفتره الجايه هتقل البوستات جدا

خلاااص الامتحانات بدأت

تقريبا شهرين

وهنرجع تاني هتوحشووووني أي فرصه هعرف اخطفها واكتب اي حاجه

اكيد هستغلها

======================

انهارده كان نهايه الراوند بتاعنا

اخر راوند ف السنه

كان فيه بريزينتيشن ع كل اللي حصل خلال الشهرين اللي فاتوا

عمله مجموعه من صحابي

البريزينتيشن كان راااائع
بل اكتر م رائع

وبعديه كان فيه اجتماع مع كل المدوّنين م الكليه

الاجتماع كان فكره جامده بصراحه

كان الكلام فيه حلو أوي شويه تاجات مررناها لبعضينا

واتفقنا ان دي مش اخر مره هنتقابل فيها

كل الجروب ما شاء الله

كنا نجنن

========================

شكر خاص لدكتورA.G.H

ع وجوده معانا واهتمامه بالمدونين

الراجل ده محترم اوي اوي اوي
فعلا حينما يتجسد الاحترام في رجل

=======================

الدكاتره المشرفين ع البريزينتيشن بتاعنا زي ما وعدتهم ليهم كلام خااااص

دكتوره ايمان مرتضي ودكتوره امنيه سمير
وكل الاستاف اللي كان معانا
بصراحه حبينا الراوند جدا
كفايه اننا اتعلمنا ان
NO (I)letter in the word TEAM

أد كده حد محترم أوي الاتنين بصراحه
صعب انك تلاقي حد زيهم كده مهتم بشغله اوي كده
فعلا شكرا ليهم جدا
وزي ما وعدتهم ليهم كلام خاص بعد الامتحانات


ربنا يوفقهم ف امتحانات الدكتوراه بتاعتهم

=======================

بس

اشوف وشكوا بخير

..........................................

تـــــــــــــــــاج

وصلني التاج ده من

الاخت اجدع بنوته

والاخت الجواز و سنينه

اولا

====

اكتب عشر اشياء عن نفسك

اسمي ممممممم دكتور بهدوء الغرض م الاسم اني بحب اعمل كل حاجه ف منتهي الهدوء

ف اصعب كليه ف الوجود او زي ما بيقولوا كليه الدحيحه

الشكل مقبول وحسن المظهر مقبول يعني .....ابن ناس يعني

اكتر ناس بحبهم بعد ربنا وسيدنا محمد طبعا

ماما وبابا واخواتي واصحابي بحبهم جدا و خلينا صريحين برضه......دكتور بهدوء

بحب دكتور بهدوء لانه حد يستاهل اني احبه( م وجهه نظري)

بحب اديه حقه

بهتم بمصلحته

بفكر بعقلي اكتر يعني العاطفه شيء تكميلي عندي بس العقل الاساس

هواياتي القرايه والكتابه والرسم

مممممم ساعات بحب الموزازاكره وقت الامتحانات تحديدا (غصب عني)

بحب الكليه مووووووت ولو رجع الزمن هدخلها تاني وتالت ورابع

مش لاقي نفسي ف حته غيرها

راضي عن نفسي علي الاقل دلوقتي جدا

اجتماعي اه بس مش شاطر ف التعبير عن ده

متردد شويه عشان ماغلطش بحب اخد اراء ناس كتير

اما بتوجع من حد مش بنسي بسهوله

كده قاسي؟؟؟؟؟

ممممممم وجهات نظر

دول كام حاجه ماعديتش

بس خلصت كده

ثانيا

====

اوجه التاج لخمسه تانيين

الاخ د نوبل مدونه حكاوي القهاوي

العزيزين الجعر وابو رمانه مدونه ابص

الاخت مفقوعه مرارتي من حماتي

الاخت فيس موون

الاخوات السته بتوع صيدله خاصه بريك وسخسوختي

ابلغ صاحب التاج اني نزلته

يااااااااااااااااااااااااااسمييييييييييييين

الجواز وسنييييييييييييييييينه

التاج هنا اهو

نزلته

كن صديقي

لا أكاد أذكر
كيف؟؟
أين؟
متي؟
التقينا
ماهو أول حوار بيننا؟
لكن
أكيد هو من اجمل ترتيبات القدر
في حياتي الجامعيه



في تلك الحياه تعرفت علي الكثير
اصدقاء بمعني الكلمه
واحبهم جدا

ولكن هو
في مكان
بعيــــــــــد
عن هؤلاء

مكان لا أعرف أن أصفه
سوي انه......

حاله خاصه
أعيشها
لا استطيع تخيل الجامعه بدونه

احد تفاصيل حياتي ليست بالبسيطه

شخصيه كلانا علي النقيض تماما من بعضنا

برغم ذلك وبالرغم من طول مده علاقتي به
فلم يتأثر أحدنا أبدا بالآخر

من النادر ان تجد شخصا معك في المطلق
دائما
نتجادل......دائما
ونهايه جدالنا غالبا مفتوحه
فكل مقتنع برأيه
لا يقنع احدنا الآخر ولكن
....نتجادل....
هل استطيع ان اصفه بأنه
صديق؟
اخ؟
ربما؟؟؟
لا ليس صديقا
وليس اخا
ولكنه
هو نفسه
ولست بحاجه لاتكلم اكثر من ذلك
فهو حاله احمل لها معان كثير جميله

البيـــــــت بيتــــك

قاعد باليل ف مكاني المفضل اما يكون النت قاطع
ع الكنبه قدام التليفزيون

وقاعد اقلب ف التليفزيون
عاااااااااادي جدا
واذا بي اجد جلبه وضوضاء م احد البرامج
توقعت ان البرنامج هو البرنامج الحواري
البيـ.....ت بيـ....تك
مجازا اذا عايزين تملو النقط فلغه الضاد مليئه بالحروف
جرب الضاد نفسه
المهم حسيت ان الموضوع سخن اوي
اموت انا
ف الحاجات الجامده
تفتكر البرنامج كان عن ايه
العيش....لالالا
الغلاء....لالالا
انت هتهزر

مخك راح لبعيد
دي مشاكل ياراجل خش ف الواقع
اتكلم ف موضوع كل يوم
اللي بيشغل كل الناس
كان عنوان الفقره كالتالي

هل توافق ان يكون لزوجتك صديق ؟

يخرج معاها ويكلمها وكده

استغربت اوي م الناس دي
الناس كانوا موافقين ومرحبين موووت

حــــــــــقهم

احنا ف عالم متحضر يا ولاه
انا افتكر ع ايام جدتي
كان يقولك الست ف عيلتنا ليها تلات خارجات وداخلتين
ليه كده
عااادي جدا تلقي مراتك بعد ماتروح م الشغل سايبالك ورقه ملزوقه ع الباب
بتقولك انا كنت زهقانه ومش عارفه اعمل ايه؟
وصاحبي عدي عليا ونزلنا


خلي بالك الصدق(نزلنا مش نزلتله يعني البيه طلع نزلها)
نكمل رسالتها
انا لسه مش عارفه هنعمل ايه هنلف بالعربيه شويه واحتمال نشيش شويه
لو اتأخرت ما تقلقش
المحبه زوجتك

الراجل بقي تلاقيه اتضايق شويه
شويه بس مش كتير
اصلها معوداه ع كده
هوه مش متضايق انها خرجت
لان ده حقها اللي بيكفلهولها الدستور
ولا زعلان عشان ماطبختش له
بتفكر في ايه....
زعلان عشان خارجه مع راجل غريب لوحدهم
لااااااااا
اصله واسك فيها
والدكاتره اللي كانوا ف البرنامج قالوا كده
امال يعني احنا هنعرف اكتر منهم
دكــــــــــــــــــــــــــــاتره
انت بتكلم ف ايه دي ناس فاهمه ودارسه
ودايسه ف كل حاجه

زعل عشان نسيت موبايلها وكان عايز يكلمها يشوفهم
ف انهي كوفي ينزل يشيّش معاهم

اصل انهارده عيد جوازهم ومتفقين يقضوه سوا

شايف منتهي ال......الحب

بس مش مشكله

وف ثانيه راح مكلم صحبته وعدت عليه هيا وجوزها عشان نازلين
تلاقيه نازل جري
وياللا بينا ع المحلات

نسي يجيب لمراته هديه عيد جوازهم
امال فين المدام
لا دي مع صديق عزيــز
وتبقي الدنيا كلها تفاهم وسعاده وفرح
صحيح يا ولاد
الرجاله ماتت ف تلاته وسبعين
وما احلي رفع الارايل

وتظبيط الدش ع قناه المطنشين

و
يعيش الزوج الزغلول
بقي ده كلام ووو

نــــــــــــــــــــــــقول كمــــــــــــــان

====================================================

تحديث واجب

-------------

شكر خاص للدكتوره اجدع بنوته علي اشادتها بيا

في مدونتها

http://dragd3banota.blogspot.com/

ونقولها هنفتقدك

وركزي ف الموزازاكره

وعاوزين رجوع قوي

=======================================================

ثانيا

انهارده بفتح البلوج لقيت 96كوممنت تخيلوا

اكبر كميه كوممنتات اتعرضت ليها ف حياتي

للتوضيح اكتر

عارفين كلنا غاده صاحبه مدونه عايزه اتجوز

اللي ما يعرفهاش اللينك اهو

http://wanna-b-a-bride.blogspot.com/

كانت حاططه شات بوكس واخ غير معرف طبعا

كان عمال بيوجهلها كلام غير محترم بالمره

ابدا

ف الشات بوكس ومدوناتها التانيه

اضطرها تعمل موديراشن للكومنتات

ماكفاهوش بقي داير وراها ف كل حته تعلق فيها ورد وراها ع طول نقد ليها

انا ومش لوحدي معايا مدونين كتير انتقدناه

لحد مارد عليا هنا وراها برضه

ورديت عليه وبلغت غاده بكده

وهيا قالتلي ع انه هيبعتلي 200

300

كومنت تهزيء

الراجل اكتفي باربعين كتر خيره

وده حصل مع الاخت مفقوعه مرارتي من حماتي

وهيه اكتفت بانها شالت الكوممنت

اكيد عمل كده عند حد تاني

دول اللي اعرفهم

يا اخ الغير معرف انت بتقول اني مش بحترم اللي بيدخل المدونه

اوك اشتري نفسك ودماغك وماتدخلش

================

الاخ الغير معرف انا مابحبش حد ينقدني

ممكن مش تدخل تاني

بحــــــــلم بدنيــــا........

الدنيا اوده كبيره للانتظار
فيها ابن ادم زيه زي الحمار
الهم واحد والملل مشترك
وما فيش حمار بيحاول الانتحار
عجبي
لحد امتي هنفضل حابسين روحنا جوه نفسينا
لحد امتي هنفضل عايشين دنيتنا زي ماهي مرسومالنا مش زي ماحنا عايزين نعيشها
لحد امتي هنفضل مش حاسين ان دي دنيتنا احنا واحنا بس اللي نحدد نعيشها ازاي وليه
مستنيين ايه؟
يا اما ان حياتنا تنتهي لحد كده وبالطريقه دي في نفس اوده الانتظار دي
وفي الحاله دي
هتكون حطيت كلمه النهايه لمتعه حياتك....لا لحياتك كلها قبل حتي ماتبتدي
يا اما مستني فرصه ان حد تاني يجي يطلعك من حبستك دي
تفتكر؟
ما افتكرش
لان الحد التاني ده ممكن ببساطه جدا يكون في اودته مستني انك انت تروح تخرجه منها
فكر
افتح الباب واخرج شوف الدنيا عامله ازاي
اعمل اللي انت عاوزه

بالشكل اللي انت عاوزه

في الوقت المناسب
الدنيا دي دنيتك تقدر تطوعها زي ما انت عاوز
ماحدش هينفعك لو عشتها بطريقته او زي ما رسمهالك
وهتكون فرطت في اول وابسط حقوقك انك تعيش دنيتك
عيش وجرب واغلط
مايهمكش
مش عيب انك تغلط
مش عاوز تغلط .. تقعد في بيتك وما تخرجش ابدا وبرضه هتغلط
مش عيب انك تغلط
العيب بجد انك ماتعرفش تصلح غلطك
او علي الاقل انك تتعلم ازاي ماتكررهوش تاني
اكيد مش معني كده انك تعيش في فوضي من غير نظام وزي ماتيجي تيجي
لا طبعا
لازم يكون فيه حدود
دين تلتزم بيه
ونظام انت اللي حاطه تحترمه
وناس عايشين معاك تراعيهم
أد كده هتكون الدنيا جميله
لو كنت انت حابب تعيشها
لان هي بتاعتك ونظامها زي مانت عاوز
حتي لو فيه حاجات مش بايدك تغيرها
فكر في حاجات تانيه تحببك في الحاجات دي
اكيد فيه تفاصيل صغيره وسط الحاجات دي هتحببك فيها

مثلا بالنسبالي مشوار الكليه الصبح ده طويل ومرهق

بس.....
بتوحشني كبايه النسكافيه
اللي هدبس فيها اول واحد هشوفه او حد هيسبقني ويدبسني فيها ليها مفعول السحر خاصه لو في البرد
بيوحشني رضا الولد الصغير بتاع المناديل
بيوحشني عامل الاسانسير بتاع المستشفي اما بروح الصبح الاقيه موقف الاسانسير تحت وقاعد يفطر بره واقوله طب انا هطلع بيه وانزلهولك تاني يفكر ثواني كده ويقولي ماشي واركب لوحدي
حاجات زي كده صغيره بس اد كده جميله تخليك تحب حاجات تانيه

في الاخر
بحلم بدنيا تحبها ناسها وتحب ناسها تشيلها فوق راسها والحب ساسها وداب في انفاسها والعيد ليلاتي يدق اجراسها
عجبتني اوي الجمله دي و......
نقول كمان

ما بحبش كــــدا

انهارده يا ولاد قلت اقول لكوا علي شويه حاجات مش بحبها أوي
طب انت مش بتحبها واحنا مالنا؟
لا تعليق
ده قدركوا ....دخلتوا يبقي هتقروا
من غير تطويل ولاهميه الموضوع البحته اللي بتفرض نفسها عليا انا شخصيا
ومن منطلق المهم ف الاهم
وخير الكلام ماقل ودل
وليه ترغي كتير اما ممكن تنجز
نخش ع طول
المقارنه
المقارنه يا ولاد
ايييييييييييييييييييييييييييييييييييه
مابحبش اني اقارن نفسي بحد
او حد يقارن نفسه بحد
مافهاش حاجه
ليه بقي؟؟؟
ببساطه الواحد دايما بيكون الطرف الخسران ف المقارنه
لانه بيقارن ف الحاجه اللي مش عندنا وعند التانيين
فغالبا بتتضايق بعد ماتخلص جلسه المقارنات بتاعتك
مثلا مثلا
الواد اللي عنده بي ام تقعد بقي تهري وتنكت في نفسك
دا عندوا بي ام يا ولاه
يا ترى اي احساس الفخفخه اللي هوه حاسه
وهوه عندوا وانا ماعنديش
وبعيد عنك ناااااار نااااااار بقي قايده
وف الاخر اول ماتشوف الواد ابو بي ام
هتغزه
هتغزه ....اه ده اللي حيحصل
فلان باباه بيعامله احسن ما بابا بيعاملني
بيكلمه وبيوافقلوا ع كل حاجه
صحاب يعني
وانت يا روح ماما باباك بيكرهك عشان بيخاف عليك
زياده شويه
صحيح انت كبرت ولازم المعامله تختلف
بس هوه بيحبك اوي وبيخاف عليك
لو اثبتله انك أد المسئوليه هيتغير
المرادي لو شفت الواد اللي ابوه بيحبه
نفس الناااار والعه هيه هيه
بس المرادي
اعتقد هتغز باباك


بص يابني عاوز تقارن
قارن
تقارن ايه
مش هقولك باللي اقل منك والكلام ده
لا تقارن انت دلوقتي ايه
وشايف نفسك بعد شويه وقت كتاار كده ايه
قارن
واعمل اللي يوصلك لده
شوف انت شايف العيب فين وعايز بعد فتره يكون مش موجود
وازاي بقي تعمل ده
ده هيبقي افيد كتير جدا م انك توجع دماغك في هبل
وسيبكوا بقي م البوتاجازات اللي جواكوا دي

انتقلنا الي العنصر التاني في موضوعنا الا وهو
حب الظهور
بالنسبالي ف الكليه دي هوايه لناس كتييييير
تلاقيه عارف مش عارف اهو بيتكلم وبيعك الدنيا ف بعضها
انك تبقي معروف جمييييل
بس بالعقل وبالصح
مش الجدال مع الدكتور ولا فتح الكتاب وتقرا كلمتين وتروح قايلهم وبرافو صقفوله
دا اللي بيعمل كده مش عارف زمايله بيقولوا عليه ايه
ولو عرف لمات قهرا
مش هطول ف ده كفايه عليه اوي كده
يا سلام بقي
خشلي ع دي
هيا دي
العيش في الماضي
مش الخبز لالالا
الحياه في الماضي
ناس خلاص خلصت كل اللي عندها وتقعد تفتكر فيه
وتعيد وتزيد
وتزيد وتعيد
مافيش جديد
وكل اما تقابلهم نفس الكلام عن الانجازات التي يجب ان يخلدها التاريخ(من وجهه نظره)
واللي يغيظ بجد
انه يفتخر بحاجه مش هوه اللي عملها
يا حلاوتك
كلمه خدها مني
الماضي مش هيرجع
فايدته دلوقت
الخبره بس
والمستقبل
اغلي كتييييييييييير م الماضي
ف السريع ف السريع كده
خش بقي في التقيله اللي جايه
النقد
واحد تلاقيه عمال ينقد في كل اللي حواليه
اكن هوه الواد اللي ايه
اوعي ولا غلطه
مع ان هوه تلاقي فيه كل العبر
النقد ده هيخلي العلاقه بينك وبين اللي بينقدك وحشه جدا
يعني هوه فاكر نفسه مين؟
موقف حصل ع حياه عيني
واحد قاعد جمبي
والدكتوره بتسأل واحد عندنا بس استاذ ف التمثيل
في المسرح عندنا ف الكليه
الواد ماعرفش عااااادي وبتتكرر كتير
الاقي اللي جمبي بيقول ماتقول
ولا انت مش شاطر غير ف التمثيل وبس
طب يا شيخ اهو فلح ف حاجه
ورينا انت بقي
ياعم الفلعوص شاطر ف ايه
وكمان اللي بيتريق ع الشكل
يافندي يا محترم
مين اللي خلقه
ولو انت حلو مين اللي خلقك
همه كان يعني بايده يبقي حلو واختار يبقي وحش
انت احمد ربنا وحط لسانك ف بقك
دايما كنت اسمع ف البرامج انهم بيقبلوا النقد البناء
في رأيي النقد البناء
هو النقد م اجل فكره غير فكره الاختلاف او الاعتراض فقط
(نهار احوس ايه اللي بقوله ده ..مش عارف قولتها ازاي...بس جامده والله...برافو عليا)
نتفق اتفاق
بص اما تلاقي مخك زنق عليك وخلاص هتنتقد حد
بص بصه كده ايه الحلو فيه
هتلاقي كتير اكتفي بثلاث مميزات
وجمله مأثره فيه لحد دلوقت
مش فاكر نصها أوي
هنتقد حد نقدايه واحده هات قصادها تلات مدحات ونبقي خالصين

افتكر اهو ماطولتش عليكو
وعرفتوا اللي مابحبهمش
مش بذمتكوا عندي حق
عشان كده نبقي استبينا وعرفنا طباع بعتشينا
وسلمني نتشيف اسلمك نتشيف

بــــــــــــــــــــــــــدايه

بسم الله الرحمن الرحيم
بدايه

انت الان حيث اوصلتك افكارك
وستكون غدا حيث تأخذك افكارك

هنا بقي اللي افكاري وصلتني ليه
وربنا يستر
دي بدايتي مع التدوين ع النت
لسه تجربه جديده
وأتمني انو يعجبكوا اللي بتقروه
وبعد ما تدخلوا مره تدخلوا تاني وتالت
وكتير اوي
بس هوه ده
بشكر كل اللي شجعني اعمل بلوج
وياريت يعجبكوا
عشان بس نتعرف
انا مصري
دكتور(لسه بيدرس)
20سنه
اعزب
ويقدس الحياه الزوجيه
ويشارك في الاثاث
لو عن شخصيتي
ما أقدرش افيدكوا كتير
بس غالبا مفرفش
ومروق
بس ساعات بقلق جدا(غالبا وقت الامتحانات)
مش عاطفي اوي
بميل للعقلانيه اكتر
يعني واي حاجه تانيه اكيد هتبان
م خلال كتاباتي

هنا هنتكلم جد شويه
وضحك شويه
وشويه حاجات تانيه
وربنا يسهل ويعجبكوا اللي بنقدمه

ولو حضرتك ماعجبكش

انزل واسأل حضرتك

مش هتلاقي زي اسعارنا

والكواليتي عندنا جامده برضه

الكوانتيتي .....مش عارف

بس ان شاء الله تلاقوا حاجه حلوه