الخميس، 3 يوليو 2008

العروسه للعريس .. والجرى للست امينه



م موقعي هذا سنناقش ونحلل ونحاور وطبعا نطلع بنتايج
آه يا ولاه ماحنا بلوجرز والبلوجرز إيه غير شويه مناقشات


وأفكار ف الدماغ
الموضوع بسيط ولطشيف جدا
نتجوز ازاي
صالات وانتريهات وصالونات وبتاع ولا عن حب
الموضوع قتل بحثا مش كده.....
بس لأول مره هدلي بدلوي فيه
استبينا
نمسك واحد واحد نقول رأينا
أولا الجواز عن حب وشوق وهيام واحلام وياسمين ونهي ده
وسهد الليالي ونــاااعـــــم يا حبيــــبي نعم
آآه والدره المشوي ع الكورنيش
وأخوها اللي بيقفشكوا
وبتبقي علقه سخنه
طبعا ده مرفوض
الولد اللي يوافق ع كده عمره مابيوصل لمرحله حدديلي معاد مع بابا


لأ البنت اللي بتوصل لأحددلك معاد مع بابا
وهنا بيبدأ التفكير
أصل البنت دي هوه رخصها طبعا بعد ما هي رخصت نفسها بزياده
مجرد انها تسمح بوضع زي
وتسمحله انو يبأه عارف انها مخبيه ع باباها


ولاطعاه ع قفاه
بترخص نفسها وعيلتها أوي
وعارفين حتي لو اتخطبوا فتره خطوبتهم بتفقد جمالها وكونها أول أحاسيس تتحس كده
وغالبا اربع شهور جواز وبيطلقوا


اه اربع شهور بس



ممكن أكون مع الجواز م النوع ده ف حاله واحده
لو اتنين مثلا طبيعي بيتعاملوا مع بعض


ظروف شغل جيره قرابه الخ


وطبيعي عرفوا بعض بس


أول ما أي حد منهم يحس تغيير من ناحيه التاني ف المشاعر


إن الموضوع بدأ يتغير م معامله عاديه
لا هنا جري ع البيت
كده هيا حافظت ع نفسها غاليه
وهوه حافظ عليها غاليه لأن هيه أصلا غاليه


هنا صدفني اي اعتراض او أي مشاكل هيعرفو ازاي يتغلبوا عليها


هنا لازم نعرف انهم بيشتروا راجل


راجل ع حق ربنا


هيبدأوا يتساهلوا معاه ف حاجات


لأنه زي ما بيقولوا جاي م الباب


هيطبقوا مبدأ إن اهم خمس حاجات ف الدنيا تلاته


الستر والصحه


وبنتهم دلوقتي ف إيد أمينه


آه أمينه دي حماتها أم الواد



وبالنسبه لجواز الصالونات بين مؤيد ومعارض
آآآآآآآآآآآه سيبقي جواز الصالونات مشكله كمشكله الثانويه العامه
كيف لنا ان نضع ضوابط عشان نحكم الليله دي
هوه صح ولا غلط
لا طبعا صح
وهوه الصح بس ازاي
البيه اللي جاي يخطب الانسه
أقل واجب يبأه جاي يخطبها فعلا


مش جاي يعاين البضاعه ويا يوافق يا لا
البنت مش شوال دقيق جاي يعاينه وتلاقي عيله العريس كل واحد بيقوم بوظيفته
مامته ماسكه ودن مامه العروسه المهم تشغلها لاكبر قدر
وباباه ياخد باباها ويطلعو عشان يسيبوا الحريم مع بعضهم اهو العيال يعرفوا يقولوا كلمتين



والبيه يشتغل بأه لف ودوران حوالين الكرسي


وينام تحت الكنبه


ومافيش مانع زغده كده




بالظبط زي ماتكون .......وبيعاينوها قبل ما تدبح





ثانيا جلسه واحده لا تكفي
مره واتنين وتلاته ان شاء الله حتي خمسه وتلاتين
طالما فيه مبدأ القبول يبأه لازم يكون عن اقتناع
وتتوفر الظروف المناسبه اللي تساعدهم الاتنين يوصلوا قرار سليم
مافيش مانع يقعدو لوحدهم
مش خلوه لأ
لا هما في الصالون وبابا وماما ف الانتريه جمبيهم بس يتكلموا يعرفوا بعض


عشان نكون فكره يا جماعه


القرار ده غالبا بيكون مره واحده
طبعا نوعيه الكلام اللي الاتنين لازم يحاولوا يغطوها


كلام عام وده هيقيسو منه ثقافه معرفع وطريقه تفكير


كلام للعريس مزايا عيوبه مرتبه يعني ايه جواز؟ واشمعني دي
والعروسه كذلك
طولت صح
بس لازم ف الاخر لا ننسي
الطيبون للطيبات
وربنا يتمم بخير


لولولولولولولولولولويىىىىىى

هناك 103 تعليقات:

د/اجدع بنوته يقول...

مش هزود حرف ع كلامك

الكلام .. ده .. A1

يوميات فنانه مفروسه جداا يقول...

طب اللي فشل في جواز الانتريهات ومالوش في ارتباطات ومعندوش معارف ولا جران يعمل ايييييييييييييه قولي

يغني ظلمووووووووووووووه

maiosha يقول...

أنا بحس إنى مؤيدة لجواز الصالونات و عايزة لما أتجوز يبقى جواز صالونات .. بس أنا فعلا معاك فى كل كلمة قلتها

أنا بحس إنه لازم يبقى بضوابط وأصول

أما حكاية بقى الدرة والكورنيش فأنا فى الناحية دى قفل مصدى

keda-sponsor يقول...

طبعا الكلام ده مينفعش يزود عليه حرف

بس ممكن في الحته بتاعه الحركات وكوز الدره دي بتبقى حركات مراهقين في الآخر ... يعني الواد بيتصدم لما تقول له تعالى قابل بابا

لكن أنا شايف أنك حللت الموضوع ولا أحسن معمل تحاليل في المحروسه

و ربنا معاك

و يا رب محدش يفتح الموضوع ده تاني بقى

أنت قلت كلمتك خلااااااااااص

الجعرّ و أبورمّانة يقول...

هااااااااااااوم *يتثاءب*
ياخي إنت مابتكتبش غير وأنا نايم..
وبعدين جواز إيه اللي إنت جاي تقول عليه..
إنت مش عندك إمتحان ENT كمان أسبوع برضه؟
وبعدين شاغل بالك ليه..دنتا علي ماتخلص -سنة 2050 - مش بعيد يكون الجواز إتلغي..أو يعملو كبسولات جواز كدا زي بتاعة الأكل بتاعت رواد الفضاء..آه كل شئ جايز..
وبعدين..وبعدين..إنت علي ماتخلّص الكلية أصلا..فكرك يعني..هاتكون صالح للجواز؟؟

انا يقول...

صباح الخير يا جعرّ..مش عارف أنا إيه الموضوع قلتله ميت مرة يكتب بدري شوية..مافيش فايدة..
وبعدين أنا معاك فعلا في موضوع كبسولات الجواز دا..أنا قريت في بحث نشرته المجلة الأمريكية "ذا ماريج أوف بيبول" للعالم الأمريكي الكبير "ف.ن.ت عبد الفتاح" قال إن مؤسسة "ماريج إن كبسولز" الأمريكية العريقة رصدت 2 مليار دولار لتطوير مشروع كبسولات الجواز..والنظام دا فعلا هيتم تطبيقه علي خريجي سنة 2050..
و طبعا هيبأة فيه كبسولات أمريكاني بتشتريها من بيرفكت ماتش عشان تديك الجرين كارد.

سفروتة يقول...

بصراحة بصراحة يعني

حضرتك قلت المفيد وبكل هدوووووء

بس انا مش مؤيدة اوي لجواز الصالونات ده،وانت بنفسك قلت انه اللي جاي ده يبقي فعلا خلاص ناوي علي الارتباط مش جايين يعاينوا بضاعة

بس ايه التحليل المنطقي الفظيع ده

لالالالالالالالالالالالا

انا ان شاء الله اكلم السيد مدير معامل التحاليل بالمنطقة عشان يوافق علي طلب معمل التحاليل بتاعك،،خصوصا بعد ما شفنا بنفسنا نتيجة التحاليل المبهرة دي

تحياتي بهدوء

Mona Shereif يقول...

هى مين الست امينه دى؟؟؟؟؟

بس تعرف كلامك كله تمام وزى الفل
وعن تجربة
جواز الصالونات
العريس بيبقى جاى وعارف هو جاى علشان اخلاقها واصلها يعنى عارف قيمتها وان شاء الله هيقدرها

Mero.. يقول...

هممممممممممم
انت حطيت ايدك على مشكلتي..
انا كدا متاكد اني صعب جدا اجمع بين مميزات الاتنين..
اتعرف على بنت كويس واعرف شخصيتها وعقليتها وتربيتها ونفس الوقت اكون حبيتها او حتى احبها بعد كدا..لاني ببساطة غير ملائم للتعامل مع الجنس الاخر..يعني مفيش فرصة اني اتعامل مع اي بنت في اي مجال بشكل عادي وينتج عن دا اعجاب وبعدين حب..
لذلك قررت اني لو اتجوزت ودا حتمال في تضاؤل مستمر هتجوز يا واحدة مش مصرية..يا اول واحدة مصرية تتقدملي :))))) بهزر

حاجات جوايا يقول...

كلامك فى الصميم
ومتفقة معك مليون فى الميه

وبجد نفسى تنتهى ظاهرة حب التلامذة والكورنيش والاسطوانات المشروخة دى
وتبدا البنت تفهم ان أحسنلها تكون شوكة صاعدة من ان تكون وردة ساقطة

خالص التحية

سالى

زى الهوا يقول...

انا بأيد جواز الصالونات جدا , بس لو جه بطريقة صح , بشكل مايحرجش البنت ابدا , وفنفس الوقت يرضى الولد تماما , هاقول لحضرتك اذاى , انا عايزة والله اجوز اخويا كدة , يعنى مثلا الولد سمع عن البنت الفولانية من حد وعجبه مؤهلها وثقافتها من خلال الحد اللى قاله عليها , بعدين يعرف هيه ساكنة فين مثلا ويعمل اى حاجة بقى علشان يشوفها , او مثلا بتشتغل فى الحتة الفولانية , يروح الشغل دا ويسأل على اى حاجة كأنه هيشتريها , المهم انه مايقعدش معاها على انه جاى يتجوزها , وبعدين تفاجأ ان مفيش اى رد منه , وانها ماعجبتهوش , ممكن تتصدم فيها دى وتتعقد

على فكرة انا ف واحدة قبل كدة اعرفها , اتعمل معاها لحوار دا , سأل عليها سكشن كام , وسأل حد من صحابها والمشكلة إنه لما سأل سأل واحدة انتيمتها , فراحت نادت لها , راح هوه قال انا اسف لأ انا اكيد غلطان على اساس مايحرجهاش , ويكلمها قبل مايقرر

هوه جواز الصالونات حلو بس يتمثل صح

funckydoctor يقول...

ايه الكلام المعدى ده
معاك أنا أكيد
تحياتى

مدحت محمد يقول...

برافو عليك

كلامك فى الجول

وبتفق معاك مش فى كل كلمة

لا
فى كل حرف

تحياتى لحضرتك

ليكوريكا يقول...

ايه العقل ده يا دكتورنا

والله مش عارف اتكلم بعدك

ربنا يتمم بخير :)

غير معرف يقول...

والله هوا أحلى بق الأخير ده

" الطيبون للطيبات "

مع احترامي طبعا لباقي التدوينة


تحياتي

An Author يقول...

بخاف جداااااااا من فكرة جواز الصالونات دى
بجد مش مرتاحه لها ابدا و ما احبش اكون فى الموقف ده فى يوم من الايام

اان احبذ اللقاء الطبيعى بس بدون تجاوزات او تعدى للخطوط الحمراء


موضوع لذيذ :)

سارة علي يقول...

تمام كلامك وعداك العيب
تقبل مرورى

موناليزا يقول...

كلام جميل جدا
وفى الاخر كل شئ نصيب

الستة بتوع صيدلة يقول...

لولولولولللللللللللى

انا حسدت البلوج دا ولا ايه
19 رد بس
يعينى يا ابنى

كلامك تمام 100% طبعا

انا اؤيد بشدة

BREAK

دكتور بهــدوء يقول...

د/اجدع بنوته
*************
منوره نور ايه وان

دايما اول كوممنت
;)

دكتور بهــدوء يقول...

يوميات فنانه مفروسه جداا
***************************
فيه حد كده

لا دا ربنا يتولاه ويتولانا جميعا
تفتكري يغني ظلموه؟؟؟ممكن يحل المشكله

دكتور بهــدوء يقول...

maiosha
**********
تحياتي ع التوافق ف الرأي
اه ياختشي دره ايه وكورنيش ايه اومال فين السايبرات والماسجس
فسح قديمه اوي

دكتور بهــدوء يقول...

keda-sponsor
*************
فعلا انا جبت م الاخر
اني وان كنت الاخير زمانه
جئت بما لم يات به الاول
واتقفل الموضوع

دكتور بهــدوء يقول...

الجعرّ و أبورمّانة
******************
صالح مين وجواز مين
تفتكر عاد فيا شنان للجواز
خلاش يابني قضت علينا

دكتور بهــدوء يقول...

انا
*****
تفتكر الاوفر دوز م الكبسولات دي يخلي الواحد يتجوز ع روحه.....
وبتتصرف عاتشي م الصيدليه ولا لازم روشته

دكتور بهــدوء يقول...

سفروتة
**********
شفتي النيجه
ولسه
بس اما افتح معمل التحايل هنحلل كل حاجه
منوره يا دكتوره سفروته

دكتور بهــدوء يقول...

Sometimes
***********
مدام امينه ماتعرفهااااش؟؟؟
لأ ماتقولش
دي مامت العريس
تحياتي لمرورك

دكتور بهــدوء يقول...

Mero..
*********
يابني انت بس عرف البنات ان انتا فاضي وهيجولك طوابير طوابير
وحددلي معاد مع عمو لو سمحت
:)))))

دكتور بهــدوء يقول...

حاجات جوايا
***********
تعيبر الورده والشوكه ولا ارررروع
تحياتي لكلامك الجامد جدا المعبر جدا جدا

دكتور بهــدوء يقول...

زى الهوا
*********
فعلا البنت هيا اللي يتقدملها وترفض لكن ان ولد يروح لحد عندها البيت وبعدين يرفضها صعبه اوي
والمفروض اهلها حتي مايسمحوش بكده

دكتور بهــدوء يقول...

funckydoctor
**************
شفت بأه معدي ازاااي وانا برضه معاك

وتحياتي مرتين
عملت ايه ف الباطنه؟؟؟

دكتور بهــدوء يقول...

مدحت محمد
*********
بعدد كل حرف متشكر لمرورك
تحياتي:)

دكتور بهــدوء يقول...

ليكوريكا
**********
عؤبال البكاري
منورني دايما


بالنسبه للعقل دا العاتشي بتاحي

دكتور بهــدوء يقول...

الضاحك الباكي
***************
طبعا احلي بق
واحلي ما ف الكوممنتات تشريفك
::))))))

دكتور بهــدوء يقول...

جـيـداء
***********
بدون تجاوزات اه وبدون تطويل مالوش داعي برضه
ولا ايه؟

دكتور بهــدوء يقول...

سارة علي
*********
دانتي اللي زي العسل
متشكر ع المرور

دكتور بهــدوء يقول...

موناليزا
**********
مرور هاديء لاهدأ
مدونه
متشكر ع الرد

دكتور بهــدوء يقول...

الستة بتوع صيدلة
********************
بريييييييييييييييييييييييك
اااااااااااااااه عودون احمد
ولا وابتدينا
لا يا ماما بأو اربعين بالعند فيكي

هاهاااا
عاااااااااااااااااااااا
حسدتونيىىىىى

مسلم يقول...

والله الدكاتره دول كلامهم حكم وصمتهم برده حكم
وياسلام ياسلام علي جواز الصالونات.
بس أنا مش عارف هما ليه سموه جواز صالونات الكلمه دي بتحسسني إني رايح أحلق....

Unknown يقول...

بصراحة رغم ان زواج الصالونات نجح مع ناس الا انى مش بأيدة او مش حاسة نفسى اعرف اتزوج بالطريقة دى
لكن بوستك فى الكثير من الاشياء المنطقية والجميلة
كل الاحترام

Miss. Sosa يقول...

السلام عليكم

معاك حق طبعا يا دكتور فى كلامك
بس زي ماقولت الموضوع قتل بحثا
لذا فأنا بقترح عليك نقطة بحثية جديدة متفرعة من نوع منهم

ماهو الشغل البحثى كدا بنحفر تحت الارض ..
المهم انا قصدي تتكلم في ايه ؟

فى جواز الانترنت ؟ جواز الشات ؟ جواز المواقع واللي بيقولوا انها مواقع دينية؟
المشكلة ان مفيش حد بقى عارف حد والبنت لما الدنيا بتقفل ف وشه والاسباب العلمية تسيطر على دماغها وتبعد عن ربنا

تقوم تقول ايه ؟ يعني هو العريس هيهبط عليه من السما .. انا لازم اسعى .. وسعيها ده بعيد عنك بيبقى منيل .. تروح تشات ولا تسجل فى موقع جواز .. وتطلع بنصاب ولا ذئب بشري وتقع فريسة للاستغلال .. هي مسكينة نفسها تتجوز لكن الناس مش طيبة زيها ووقعت فى شرار البشر

اطرق باب الموضوع ده .. انصح الناس انها ماتفقد ثقتها بربنا مهما كان عليها ضغوط .. انما امره اذا اراد شيئا ان يقول له كن فيكون

سلاااااام

Empress appy يقول...

وعارفين حتي لو اتخطبوا فتره خطوبتهم بتفقد جمالها وكونها أول أحاسيس تتحس كده
وغالبا اربع شهور جواز وبيطلقوا


اه اربع شهور بس
كلامك مش صح خالص فى دى بقى معلش
اختى حبت جوزها سنتين واتجوزوا باقلهم تلات سنين ومعاها ايمو ابنها والحمد لله كويسه
بص هى بتقف على نوعيه العلاقه يعنى ممكن يحبها وهى مش تستغفل اهلها وتكون محترمه هو ده الصح
وبعدين انا ضد الانتريهات والصالونات لان ده اللى بيحصل بعده الخيانه ليه انسان زى اخ كده هيتجوز كمان شهرين انتريهات برضه او المخدماتى جاب له واحده دكتورة اكبر منه بسنتين ووافق هو عليها علشان من عيله ودكتورة
عارف لما بقوله هتتجوز ليه يعنى بتحبها او حبتها قالى لا مش بطاله دكتورة ومن عيله وخلاص وعلشان معملش مصيبه لاهلى يقصد يغلط وعلى الرغم من انه بيموت فى واحده تانيه بس فيه فرق اجتماعى بس ومامته عاوزة تجوزة دكتورة
البنت بقى وافقت علىه ليه مع انها اكبر منه لان بقى عندها 26 سنه ومتجوزتش ومش عاوزة تعنس
وده اغلبيه الصالونات واللى بعدها بيرجع الولد لحياته العاديه ويحب ويتحب وفيه كرسى فى البيت بيرجع له سورى يا دكتور بس دى حكايه واقعيه من ضمن الاف الحكايات مش مسأله مين رخصه نفسها ومين غاليه الادب والاخلاق فى كل الحالات معروفين
يعنى انا فى نظرى البينت دى معندهاش اخلاق لانها قالت عريس والسلام واهو مركز وخلاص ولو فى يوم حبت او شافت حد تانى مش هتبقى خيانه
معلش طولت عليك بس انت فتحت موضوع مهم

رئـــــيسـة حزب الأحلام يقول...

ماشاء الله ربنا يكملك بعقلك بجد
وعجنتنى الجمله دى اوى
مش جاي يعاين البضاعه ويا يوافق يا لا
البنت مش شوال دقيق جاي يعاينه وتلاقي عيله العريس كل واحد بيقوم بوظيفته
بجد الواحد بيحس بيها اوى وفعلا البنت لما بتحس بكدة بتبقى نفسيا زى الزفت
واسأل مجرب
تحباتى لك

زفته وقطران يقول...

كلامك مينفعش حد يقول بعده حاجه

Marionette يقول...

طب بعد الكلام الجميل الكوميدي ده معرفناش ايه الحل برضو


في امل يعني و لا ايه الكلام .. انا عاوزة اتجوز :'(

darkskies يقول...

يحيا جواز الصالونات
هييييييه

دعوة للأمل يقول...

كلامك واقعى و بيحصل بس اعتقد ان جواز الصالونات ممكن ينجح لما يكون فى تفاهم و تحياتى

3ala asm masr يقول...

مبروك
واحسن حاجه ان ادليت بدلوك وانا متفقه معاك بشده

الستة بتوع صيدلة يقول...

50

قر قر يعنى

Ana keda يقول...

فى الاول وفى الاخر كله قسمة ونصيب

لو كان نصيبك فين هتلاقيه والله لو اتنططنا كله قسمة ونصيب الى رايده ربنا بيكون

هى الناس لاقية تتجوز اصلا

ههههههههههههههه

يبنى فى ازمة

زى الهوا يقول...

انا اقصد انه يعمل اللى عليه اووى علشان ربنا يبارك له والجوازة تتم , وبعدين هوه رايح وهوه جاهز والدليل على كدة انه بيدور على عروسة , يبقى يترفض ليه ؟؟؟ ماعتقدش إن بقى فى زماننا دا بنات سطحيين بيقولوا دا مناخيره كبيرة او بتاع , وبعدين انا بعدها مرحلة من المراحل , يعنى مرحلة قبولها وبعدين مرحلة قبوله ( او العكس مش هتفرق ) وبعدين قبول العائلة , فهوه كدة انجز مرحلة من المراحل

mostafa rayan يقول...

بص انت جبيت من الأخر الطيبون للطيبات
تحياتي ليك

صيدلانيه طالعه نازله يقول...

انت كلامك صح ان التعارف يبقى بأصول
يعنى تعارف عائلى الاول و لو فيه قبول مبدئيا يبقى ممكن يتكلموا لوحدهم زى ما انت قلت فى الصالون مثلا
ده بيخلى غلاوه البنت اكتر مفيش كلام

يارب احلامي تتحقق يقول...

الكلام الي انت بتقوله دهصح الصح
انا مواقفه ان الحب الي من ورا الاهل ده اهانه للبنت و الولد كمان و انه غالبا مش جد
اما جواز الصالونات ده حكايه يعني مطلوب بعد قاعده تحدد اذا كنت انت استريحت للشخص ده ولا لا وطبعا صعب جداا و بيكون كل واحد في حيره
يعني انا والله لما بيجيلي عريس بالطريقه ديه
والله بحس بعد ما يمشي
اني فاكره وشه طشاش ازاي بقه حقد احدد اذا كنت مستريحه له ولا لا بس حنعمل ايه ادينا صابرين و نجلاء فتحي و يسرا
وشكرااا

دعاء مواجهات يقول...

ازيك يادكتوووور

انا رجعت النهاردة

اية اخبارك طمننى

سلاام

الجواز و سنينه يقول...

هاقولك المفيد
الجواز قسمه و الشبراويشى
ههههههههههههههههههه
بص الناس كلها فى الغالب بتتجوز جواز صالونات
للاسباب اللى قلتها
بس فى الاخر بتلاقى البنت نفسها شوال رز
و هو كمان شوال بطاطس
يعنى بيشتغل ايه بياخد كام هايسكن فين و اخلاقه و الذى منه
و فى النهايه مش بيفهموا
لانهم اختاروا بالمسطره

Darsh يقول...

نقووووووول كمااااااااان

متفق معاك تماما

مع بعض التحفظ في حالة جواز الصالونات

لإن المبدأ إن واحد سمع عن واحدة حلوة و جميلة و لذيذة و دمها خفيف و محترمة و بتشتغل - لازم دلوقتي تكون بتشغتل - يبقى يروح يعاينها و كأنه رايح يشتري بطيخة يا تطلع قرعة يا حمرا !!!!

ما يصحش طبعاً

كده البنت بقت سلعة

و انا مش معقول أرضى أن واحدة ممكن تكون مراتي تتحط في الموقف ده

بس انا لما قعدت أفكر في كل الحلول لقيت الموضوع معقد جداً

و لأني راجل بيفكر كتير

و لازم أكون مقتنع باللي بعمله

فقررت العزوف عن هذا الفعل .... ألا و هو يا عم الجواز

عمرو وجيه يقول...

بس لحظة بس كده


هو فى حاجة غلط من وجهه نظرى



انا حاسس انك موافق على حكاية جواز الصالونات



انا مش معاك خالص


جواز الصالونات بيقى دمه تقيل

و بيولد مشاكل كبيرة بعد كده



بس الجواز عن حب بيبقى اقوى و بيدوم ....



ده من وجهه نظرى يعنى ......



و انا مش معاك ان اللى بيحب مش هيتقدم لو فعلا بيحبها بجد هيرووووووح




تحياتى لك

عمرو

دعاء مواجهات يقول...

هههههههههههههههههههه

اية دة وكمان بتعرفر تزغرد لاجاااامد بجد

انا معااك وبعلنها من موقعى

معك قلبا وقالبا يادكتور

كل حرف وكل همسة قولتها صح

معاك معاك معاااااااااااااك

بييس

البوست نزل ياعم فينك؟؟

حنين.. يقول...

جميل البوست, وانا طبعا معاك فى ان الجواز المبنى على الحب والعلاقات وكدا , غالبا بتبقى نهايته تعيسه حتى لو اتجوزوا, ومش عارفه يعنى ايه جواز صالونات, يعنى انا مثلاا, لما اتقدملى عرسان ولا واحد شافنى ولا قعد معايا, كان العريس يتقدم لا بويه او لحد من قرايبى وانا اسأل الاول عليه وعلى ظروفه وكدا..... وبعدين اقرر يشوفنى ولا لا, وكمان عندنا العريس لما يقعد مع العروسه يبقى لازم يكون الطرفين موافقين على بعض مبئديا الاول, مش عارفه بقى دا اسمه جواز ايه,, وعلى فكره يا دكتور انا كان ليا اصحاب بيحبوا واتخطبوا دلوقتى وعايشين مبسوطين الا الآن, وعلى الرغم من اعتراضى , الا انى ببقى مبسوطه اوى لما اعرف ان اتنين كانوا بيحبوا بعض واتخطبوا, والله حاجه تلخبط, بص هقول لحضرتك حاجه, الجواز دا قسمه ونصيب ومكتوب عند ربنا وخلاص بس الاول تكون نيتنا طيبه واختيارنا صحيح, ونصحيه منى لاى حد اتجنن واتخبل فى عقله وعايز يتجوز... يختار الدين والاخلاق, لان الحياه بقت صعبه اوووووووى, وبلا جواز بلا قرف, دا احنا اخوات واصحاب وقرايب مش عارفين نعيش مع بعض ونستحمل بعض..... تحياتى, تفيل مرورى... فى انتظار المزيد

مصر يا موكوسه .....يا مزارع الكوسه يقول...

انا اول مرة اجى مدونتك بس بجد عاجبانى جدا وانت عسللللل

t3ban يقول...

طب سؤال
تأمن تتجوز واحدة متعرفهاش
بمعني
منت تقلي مكتب و زميلة كلية وكل ده علي عيني و راسي
بس انت تعرف عنها اه
انا في رأيي ان احسن الجوازات جواز الصلونات
علي الأقل انت عارف اصلها و فصلها
و أبوها وأمها عن طريق الي دلك عليها
و في النهاية مفسيش حب
هو شر لابد منه و الي ربنا يكرمه الي يقدر يعيش بعيد عنه

دكتور بهــدوء يقول...

مسلم
*****
الله يخليك دا بس م زوءك

دكتور بهــدوء يقول...

نهر الحب
********
يمكن جواز الصالونات العادي مش حاسساه
طب والمعدل بالشروط اللي قلنا عليها ياتري
ممكن يعجبك

دكتور بهــدوء يقول...

Miss. Sosa
**************
منوره يا مسس سوسا
انتي حطيتي ف دماغي فعلا نقطه مهمه
بس ابلور الموضوع وانزله فوراااااا
ان شاء الرحمن

دكتور بهــدوء يقول...

appy
********
ازيك يا ابي
منوره كالعاده
بصي يا ستي الشواز تؤكد القاعده

الاكتر ف الجواز عن تعارف وكده بيفشل الاقل بينجح
وربنا يديم ع اختك السعاده دايما يا رب

دكتور بهــدوء يقول...

رئـــــيسـة حزب الأحلام
***********************
ربنا يكرمك يارب
واحنا بنعمل ايه ماهو م اجل مستقبل افضل لاولادنا

دكتور بهــدوء يقول...

زفته وقطران
*************
منورين رغم ان الاسااامي....بس منورين طبعاااا

دكتور بهــدوء يقول...

Marionette
**************
الاسم اولااا رااائع وطبعا فيه امل
ونهي ومني وكمان الجديد
نازل رجاء

دكتور بهــدوء يقول...

darkskies
*************
يا يعيش يا يعيش يا يعيش
منور
هههههههه

دكتور بهــدوء يقول...

دعوة للأمل
***********
دا اللي بنقول عليه تفاهم بين الولاد وتفهم م الاهل

دكتور بهــدوء يقول...

3ala asm masr
**************
انا دايما كده اول ماحس ان حد متفق معايا ادلي بدلوي ع طول
منوراني جدااااا

دكتور بهــدوء يقول...

الستة بتوع صيدلة
*****************
خمسه وخميسه
خمسين وخمسينه

دكتور بهــدوء يقول...

Ana keda
*************
لا ياستي بيتجوزوا
عؤبالي
اما تجيلي قسمتشي

دكتور بهــدوء يقول...

زى الهوا
***********
يا فلسفتك ....
مقتنع جدا ع فكره

دكتور بهــدوء يقول...

mostafa rayan
****************
انا دايما بجيب م الاخر
ومنورني وتحياتي طبعاااا ليك

دكتور بهــدوء يقول...

صيدلانيه طالعه نازله
*********************
يبأه متفقين

منوره وتحياتي ليكي

دكتور بهــدوء يقول...

يارب احلامي تتحقق
********************
هههههههههههههه
لا دا كده قديم اوي
دلوأتي فيه مني زكي وحنان ترك ونعيمه عاكف عادي جدا

دكتور بهــدوء يقول...

دعاء مواجهات
***************
الف حمد الله ع سلامتك
وميرسي ع كومنتك الجميل جدا

دكتور بهــدوء يقول...

الجواز و سنينه
****************
ههههههههههههههههه
عسلللل
والله دمك شربات

دكتور بهــدوء يقول...

Darsh
**********
العزووووف
وااااو
كلام كبير
جبتها منين الكلمه دي يا درش
الله يسهلوووو بتزاكر ف الاجازه

دكتور بهــدوء يقول...

عمرو وجيه
*************
احنا بنتكلم عن جواز صالونات سكند اديشن
بشروط وحدود
مش العادي
ومنور
والاختلاف ف الرأي لايفسد اي حاجه

دكتور بهــدوء يقول...

حنين..
*********
مرورك نسمه وخفيف فعلا
وكويس اننا راينا م راي بعض
وطبعا الشواز تؤكد القاعده
ولا ايه

دكتور بهــدوء يقول...

ابتسم من فضلك
***************
دانتا اللي سكر ومنور اول وتاني وخمستاشر مره

دكتور بهــدوء يقول...

t3ban
***********
طبعااا ماده اللي بنكلم عنه ف البوست جواز الصالونات مصلحتك اولاااا

Mafrousa يقول...

يا خرااابي
انا جايه تقريبا شهر متأخر
هههههههههههه
معلش العتب على الفرسه اللي انا فيها و مأخراني

والله الواحد مش عارف يقولك ايه؟؟؟
بس انا اتجوزت جواز صالونات و مش كنت احب اتجوز جواز صالونات
مش ترمس و سميط و كورنيش
لأ كنت عاوزه اعرفه في شغل مثلا ..او جامعه كده يعني
يالله نصيب

كلامنجي يقول...

الموضوع ده من المواضيع الي نقدر نتكلم فيها بكل سهوله وجراءه ونقدر نوصل بمفهوم المثاليه للشباب بس لا انا ولا الشباب الي هايوصلهم المفهوم ده ويحسوا هتقدرو تغيرو حاجه وطباعا عارفين ليه؟؟؟؟؟؟

عروسة ننوسة يقول...

ايه ده كله ...كرهت الناس فى الجواز
بس بجد بوست هادف وحلو اوى وقلت فيه كل حاجة

أم أحمد المصرية يقول...

اخي العزيز دكتور بهدوء
اولا ازيك لأني لم ازورك من فترة انت كنت بتمتحن و بعدين انا انشغلت معلش سماح :)
اما عن الموضوع ده بقي افهم منه ايه انك مثلا بتفكر :))
علي العموم لا يوجد قاعدة واحدة للزواج تختلف الطرق بس يجب مراعاة شرط واحد في كل الحالات" ما نزعلش ربنا عشان يبارك في الجاي من عمرنا معا "
انا شخصيا تزوجت زواج صالونات و الحمد لله و ماشاء الله و الله اكبر نجح معي بالرغم اني زمااااااااان لم اكن اؤيده
اختيار العقل الذي يؤيده القلب بحدوث التوافق المبدأي
افضل من اختيار القلب الخالص و تغييب العقل و تحدث الصدمة بعد الزواج و هبوط فوران المشاعر
ربنا يرزقك ببنت الحلال في الوقت المناسب ان شاء الله

ملحوظة هامة جدا :
انا عندي بنتين
هههههههههههههههههههه

زى الهوا يقول...

مستنية جديدك يافندم

غير معرف يقول...

فيه اللى اتجوزوا عن حب وسعداء
وفيه اللى اتجوزوا صالوناتى وعداء
وفيه اللى عملوا كده وتعاء
وفيه اللى ماتجوزوش وبيبوسوا ايديهم وش وظهر على النعمه
الموضوع اولا واخيرا توفيق إلهى
وماينفعش السعى فيه
ولا ايه

break يقول...

92
92
92
92
92
92
92
92
92

و بيا هيبقوا 93
93
93
93

سفروتة يقول...

ياسيادة حضرة الدكتور


روح زور كوكب السفاريت عشان فيه تاج مستنيك هناك

واياك تفلفص منه

سلااااااااااام

Unknown يقول...

فين جديدك لية منقطع من فترة ؟؟

بنت مصريه يقول...

انا زواجى كان من النوع التانى
زوجى كان زميلى ف الماجستير
وسبحان الله فجأه لقيته ف بيتنا
هههههههههههه
بالنسبه لزواج الصالونات فيه نادى جنبنا
بيبقى فيه قعدات من دى كل يوم
ربنا يتمم للكل بخير لو لو لو لو لىىىى

دعاء مواجهات يقول...

إزيك يادكتورنا الكبير

ربنا يعينك ياارب وتفضى كدة على خير

نورت بلوجى بالزياة لاخاطفة الحلوة دى بجد

انت متعرفش مكانتك عندى عاملة ازاى؟...

منتظرينك بعودة قوية..

بيس

seven يقول...

بص موضوع جولز الصالونات ده
سعات بينفع وسعات لا
زى بالظبط الجواز عن حب سعات بيتفع وسعات لا
بس بصراحة اهم حاجة الواحد يدور على واحدة محترمة
ومن عيلة محترمة انما الجواز عن حب
مش مقتنع بيه اوى اصلا عقبال مالواحد يحب وبعدين يتجوز
يكون شوية الحب اللى عندوا خلصوا
عشان معظم الشباب دلوقتى بحس ان عمر المراهقة بيوصل عندهم لحد 30 سنة
واكتر كمان فبيطلعوا كل المشاعر اللى جواهم مرة واحد ولما يجو يتجوزوا
مبيلقوش حاجة جديدة يعملوها
بصراحة انا شايف ان نسبة الحب قلت فى البلد
اى حد معجب بوحده يبقة خلاص كده حبها و البنت كذالك
محدش فاهم يعنى ايه حب اصلا عشان يتجوزوا عن حب
بس بالنسبة لجواز الصالوانات لازم يتعمل بطريقة محترمة
مترخصش البنت كده وتتعامل على انها سلعة هيعينوها طلعت حلوة
كان بها مطلعتش السوق مليان

Unknown يقول...

مدونتك جميله بجد مش هقدر اقول غير تحياتى ليكى ولمدونتك

nor يقول...

كلامك جميل و منطقي جدا
بس عارف الجواز ازاي ؟؟ تسمح لي ارد
و لا بالصحوبيه و لا بالحب و لا بالصالونات
ده يا بني مكتوب علي الجبين
كل واحد اسمه لازق في اسمه اللي هيتجوزة
مكتوب في اللوح المحفوظ
بنقول اننا بنختار بس انا مقتنعه بانه لا اختيار في الجواز نهاااائي
تحيه لك يا دكتور

دكتور بهــدوء يقول...

كلللللللللللللل
الردود اللي مش رديت عليها
واحد واحد
وواحده واحده


قريت الردود كلهااااااااااااا
وميرسي ع الردود بجدددددددد
********************************
خلصت امتحانات ومستنيكوا كلكو ف البوست الجديد
قريبا ف الاسواق

prince4ever يقول...

101 تعليق...
ربنا يزيد ويبارك

prince4ever يقول...

بقم 102

طوبه فضه وطوبه دهب يقول...

جميل الكلام ده عين العقل ياريت كل الناس تفكر كده بهنيك على عقلك