البيـــــــت بيتــــك

قاعد باليل ف مكاني المفضل اما يكون النت قاطع
ع الكنبه قدام التليفزيون

وقاعد اقلب ف التليفزيون
عاااااااااادي جدا
واذا بي اجد جلبه وضوضاء م احد البرامج
توقعت ان البرنامج هو البرنامج الحواري
البيـ.....ت بيـ....تك
مجازا اذا عايزين تملو النقط فلغه الضاد مليئه بالحروف
جرب الضاد نفسه
المهم حسيت ان الموضوع سخن اوي
اموت انا
ف الحاجات الجامده
تفتكر البرنامج كان عن ايه
العيش....لالالا
الغلاء....لالالا
انت هتهزر

مخك راح لبعيد
دي مشاكل ياراجل خش ف الواقع
اتكلم ف موضوع كل يوم
اللي بيشغل كل الناس
كان عنوان الفقره كالتالي

هل توافق ان يكون لزوجتك صديق ؟

يخرج معاها ويكلمها وكده

استغربت اوي م الناس دي
الناس كانوا موافقين ومرحبين موووت

حــــــــــقهم

احنا ف عالم متحضر يا ولاه
انا افتكر ع ايام جدتي
كان يقولك الست ف عيلتنا ليها تلات خارجات وداخلتين
ليه كده
عااادي جدا تلقي مراتك بعد ماتروح م الشغل سايبالك ورقه ملزوقه ع الباب
بتقولك انا كنت زهقانه ومش عارفه اعمل ايه؟
وصاحبي عدي عليا ونزلنا


خلي بالك الصدق(نزلنا مش نزلتله يعني البيه طلع نزلها)
نكمل رسالتها
انا لسه مش عارفه هنعمل ايه هنلف بالعربيه شويه واحتمال نشيش شويه
لو اتأخرت ما تقلقش
المحبه زوجتك

الراجل بقي تلاقيه اتضايق شويه
شويه بس مش كتير
اصلها معوداه ع كده
هوه مش متضايق انها خرجت
لان ده حقها اللي بيكفلهولها الدستور
ولا زعلان عشان ماطبختش له
بتفكر في ايه....
زعلان عشان خارجه مع راجل غريب لوحدهم
لااااااااا
اصله واسك فيها
والدكاتره اللي كانوا ف البرنامج قالوا كده
امال يعني احنا هنعرف اكتر منهم
دكــــــــــــــــــــــــــــاتره
انت بتكلم ف ايه دي ناس فاهمه ودارسه
ودايسه ف كل حاجه

زعل عشان نسيت موبايلها وكان عايز يكلمها يشوفهم
ف انهي كوفي ينزل يشيّش معاهم

اصل انهارده عيد جوازهم ومتفقين يقضوه سوا

شايف منتهي ال......الحب

بس مش مشكله

وف ثانيه راح مكلم صحبته وعدت عليه هيا وجوزها عشان نازلين
تلاقيه نازل جري
وياللا بينا ع المحلات

نسي يجيب لمراته هديه عيد جوازهم
امال فين المدام
لا دي مع صديق عزيــز
وتبقي الدنيا كلها تفاهم وسعاده وفرح
صحيح يا ولاد
الرجاله ماتت ف تلاته وسبعين
وما احلي رفع الارايل

وتظبيط الدش ع قناه المطنشين

و
يعيش الزوج الزغلول
بقي ده كلام ووو

نــــــــــــــــــــــــقول كمــــــــــــــان

====================================================

تحديث واجب

-------------

شكر خاص للدكتوره اجدع بنوته علي اشادتها بيا

في مدونتها

http://dragd3banota.blogspot.com/

ونقولها هنفتقدك

وركزي ف الموزازاكره

وعاوزين رجوع قوي

=======================================================

ثانيا

انهارده بفتح البلوج لقيت 96كوممنت تخيلوا

اكبر كميه كوممنتات اتعرضت ليها ف حياتي

للتوضيح اكتر

عارفين كلنا غاده صاحبه مدونه عايزه اتجوز

اللي ما يعرفهاش اللينك اهو

http://wanna-b-a-bride.blogspot.com/

كانت حاططه شات بوكس واخ غير معرف طبعا

كان عمال بيوجهلها كلام غير محترم بالمره

ابدا

ف الشات بوكس ومدوناتها التانيه

اضطرها تعمل موديراشن للكومنتات

ماكفاهوش بقي داير وراها ف كل حته تعلق فيها ورد وراها ع طول نقد ليها

انا ومش لوحدي معايا مدونين كتير انتقدناه

لحد مارد عليا هنا وراها برضه

ورديت عليه وبلغت غاده بكده

وهيا قالتلي ع انه هيبعتلي 200

300

كومنت تهزيء

الراجل اكتفي باربعين كتر خيره

وده حصل مع الاخت مفقوعه مرارتي من حماتي

وهيه اكتفت بانها شالت الكوممنت

اكيد عمل كده عند حد تاني

دول اللي اعرفهم

يا اخ الغير معرف انت بتقول اني مش بحترم اللي بيدخل المدونه

اوك اشتري نفسك ودماغك وماتدخلش

================

الاخ الغير معرف انا مابحبش حد ينقدني

ممكن مش تدخل تاني

بحــــــــلم بدنيــــا........

الدنيا اوده كبيره للانتظار
فيها ابن ادم زيه زي الحمار
الهم واحد والملل مشترك
وما فيش حمار بيحاول الانتحار
عجبي
لحد امتي هنفضل حابسين روحنا جوه نفسينا
لحد امتي هنفضل عايشين دنيتنا زي ماهي مرسومالنا مش زي ماحنا عايزين نعيشها
لحد امتي هنفضل مش حاسين ان دي دنيتنا احنا واحنا بس اللي نحدد نعيشها ازاي وليه
مستنيين ايه؟
يا اما ان حياتنا تنتهي لحد كده وبالطريقه دي في نفس اوده الانتظار دي
وفي الحاله دي
هتكون حطيت كلمه النهايه لمتعه حياتك....لا لحياتك كلها قبل حتي ماتبتدي
يا اما مستني فرصه ان حد تاني يجي يطلعك من حبستك دي
تفتكر؟
ما افتكرش
لان الحد التاني ده ممكن ببساطه جدا يكون في اودته مستني انك انت تروح تخرجه منها
فكر
افتح الباب واخرج شوف الدنيا عامله ازاي
اعمل اللي انت عاوزه

بالشكل اللي انت عاوزه

في الوقت المناسب
الدنيا دي دنيتك تقدر تطوعها زي ما انت عاوز
ماحدش هينفعك لو عشتها بطريقته او زي ما رسمهالك
وهتكون فرطت في اول وابسط حقوقك انك تعيش دنيتك
عيش وجرب واغلط
مايهمكش
مش عيب انك تغلط
مش عاوز تغلط .. تقعد في بيتك وما تخرجش ابدا وبرضه هتغلط
مش عيب انك تغلط
العيب بجد انك ماتعرفش تصلح غلطك
او علي الاقل انك تتعلم ازاي ماتكررهوش تاني
اكيد مش معني كده انك تعيش في فوضي من غير نظام وزي ماتيجي تيجي
لا طبعا
لازم يكون فيه حدود
دين تلتزم بيه
ونظام انت اللي حاطه تحترمه
وناس عايشين معاك تراعيهم
أد كده هتكون الدنيا جميله
لو كنت انت حابب تعيشها
لان هي بتاعتك ونظامها زي مانت عاوز
حتي لو فيه حاجات مش بايدك تغيرها
فكر في حاجات تانيه تحببك في الحاجات دي
اكيد فيه تفاصيل صغيره وسط الحاجات دي هتحببك فيها

مثلا بالنسبالي مشوار الكليه الصبح ده طويل ومرهق

بس.....
بتوحشني كبايه النسكافيه
اللي هدبس فيها اول واحد هشوفه او حد هيسبقني ويدبسني فيها ليها مفعول السحر خاصه لو في البرد
بيوحشني رضا الولد الصغير بتاع المناديل
بيوحشني عامل الاسانسير بتاع المستشفي اما بروح الصبح الاقيه موقف الاسانسير تحت وقاعد يفطر بره واقوله طب انا هطلع بيه وانزلهولك تاني يفكر ثواني كده ويقولي ماشي واركب لوحدي
حاجات زي كده صغيره بس اد كده جميله تخليك تحب حاجات تانيه

في الاخر
بحلم بدنيا تحبها ناسها وتحب ناسها تشيلها فوق راسها والحب ساسها وداب في انفاسها والعيد ليلاتي يدق اجراسها
عجبتني اوي الجمله دي و......
نقول كمان

ما بحبش كــــدا

انهارده يا ولاد قلت اقول لكوا علي شويه حاجات مش بحبها أوي
طب انت مش بتحبها واحنا مالنا؟
لا تعليق
ده قدركوا ....دخلتوا يبقي هتقروا
من غير تطويل ولاهميه الموضوع البحته اللي بتفرض نفسها عليا انا شخصيا
ومن منطلق المهم ف الاهم
وخير الكلام ماقل ودل
وليه ترغي كتير اما ممكن تنجز
نخش ع طول
المقارنه
المقارنه يا ولاد
ايييييييييييييييييييييييييييييييييييه
مابحبش اني اقارن نفسي بحد
او حد يقارن نفسه بحد
مافهاش حاجه
ليه بقي؟؟؟
ببساطه الواحد دايما بيكون الطرف الخسران ف المقارنه
لانه بيقارن ف الحاجه اللي مش عندنا وعند التانيين
فغالبا بتتضايق بعد ماتخلص جلسه المقارنات بتاعتك
مثلا مثلا
الواد اللي عنده بي ام تقعد بقي تهري وتنكت في نفسك
دا عندوا بي ام يا ولاه
يا ترى اي احساس الفخفخه اللي هوه حاسه
وهوه عندوا وانا ماعنديش
وبعيد عنك ناااااار نااااااار بقي قايده
وف الاخر اول ماتشوف الواد ابو بي ام
هتغزه
هتغزه ....اه ده اللي حيحصل
فلان باباه بيعامله احسن ما بابا بيعاملني
بيكلمه وبيوافقلوا ع كل حاجه
صحاب يعني
وانت يا روح ماما باباك بيكرهك عشان بيخاف عليك
زياده شويه
صحيح انت كبرت ولازم المعامله تختلف
بس هوه بيحبك اوي وبيخاف عليك
لو اثبتله انك أد المسئوليه هيتغير
المرادي لو شفت الواد اللي ابوه بيحبه
نفس الناااار والعه هيه هيه
بس المرادي
اعتقد هتغز باباك


بص يابني عاوز تقارن
قارن
تقارن ايه
مش هقولك باللي اقل منك والكلام ده
لا تقارن انت دلوقتي ايه
وشايف نفسك بعد شويه وقت كتاار كده ايه
قارن
واعمل اللي يوصلك لده
شوف انت شايف العيب فين وعايز بعد فتره يكون مش موجود
وازاي بقي تعمل ده
ده هيبقي افيد كتير جدا م انك توجع دماغك في هبل
وسيبكوا بقي م البوتاجازات اللي جواكوا دي

انتقلنا الي العنصر التاني في موضوعنا الا وهو
حب الظهور
بالنسبالي ف الكليه دي هوايه لناس كتييييير
تلاقيه عارف مش عارف اهو بيتكلم وبيعك الدنيا ف بعضها
انك تبقي معروف جمييييل
بس بالعقل وبالصح
مش الجدال مع الدكتور ولا فتح الكتاب وتقرا كلمتين وتروح قايلهم وبرافو صقفوله
دا اللي بيعمل كده مش عارف زمايله بيقولوا عليه ايه
ولو عرف لمات قهرا
مش هطول ف ده كفايه عليه اوي كده
يا سلام بقي
خشلي ع دي
هيا دي
العيش في الماضي
مش الخبز لالالا
الحياه في الماضي
ناس خلاص خلصت كل اللي عندها وتقعد تفتكر فيه
وتعيد وتزيد
وتزيد وتعيد
مافيش جديد
وكل اما تقابلهم نفس الكلام عن الانجازات التي يجب ان يخلدها التاريخ(من وجهه نظره)
واللي يغيظ بجد
انه يفتخر بحاجه مش هوه اللي عملها
يا حلاوتك
كلمه خدها مني
الماضي مش هيرجع
فايدته دلوقت
الخبره بس
والمستقبل
اغلي كتييييييييييير م الماضي
ف السريع ف السريع كده
خش بقي في التقيله اللي جايه
النقد
واحد تلاقيه عمال ينقد في كل اللي حواليه
اكن هوه الواد اللي ايه
اوعي ولا غلطه
مع ان هوه تلاقي فيه كل العبر
النقد ده هيخلي العلاقه بينك وبين اللي بينقدك وحشه جدا
يعني هوه فاكر نفسه مين؟
موقف حصل ع حياه عيني
واحد قاعد جمبي
والدكتوره بتسأل واحد عندنا بس استاذ ف التمثيل
في المسرح عندنا ف الكليه
الواد ماعرفش عااااادي وبتتكرر كتير
الاقي اللي جمبي بيقول ماتقول
ولا انت مش شاطر غير ف التمثيل وبس
طب يا شيخ اهو فلح ف حاجه
ورينا انت بقي
ياعم الفلعوص شاطر ف ايه
وكمان اللي بيتريق ع الشكل
يافندي يا محترم
مين اللي خلقه
ولو انت حلو مين اللي خلقك
همه كان يعني بايده يبقي حلو واختار يبقي وحش
انت احمد ربنا وحط لسانك ف بقك
دايما كنت اسمع ف البرامج انهم بيقبلوا النقد البناء
في رأيي النقد البناء
هو النقد م اجل فكره غير فكره الاختلاف او الاعتراض فقط
(نهار احوس ايه اللي بقوله ده ..مش عارف قولتها ازاي...بس جامده والله...برافو عليا)
نتفق اتفاق
بص اما تلاقي مخك زنق عليك وخلاص هتنتقد حد
بص بصه كده ايه الحلو فيه
هتلاقي كتير اكتفي بثلاث مميزات
وجمله مأثره فيه لحد دلوقت
مش فاكر نصها أوي
هنتقد حد نقدايه واحده هات قصادها تلات مدحات ونبقي خالصين

افتكر اهو ماطولتش عليكو
وعرفتوا اللي مابحبهمش
مش بذمتكوا عندي حق
عشان كده نبقي استبينا وعرفنا طباع بعتشينا
وسلمني نتشيف اسلمك نتشيف

بــــــــــــــــــــــــــدايه

بسم الله الرحمن الرحيم
بدايه

انت الان حيث اوصلتك افكارك
وستكون غدا حيث تأخذك افكارك

هنا بقي اللي افكاري وصلتني ليه
وربنا يستر
دي بدايتي مع التدوين ع النت
لسه تجربه جديده
وأتمني انو يعجبكوا اللي بتقروه
وبعد ما تدخلوا مره تدخلوا تاني وتالت
وكتير اوي
بس هوه ده
بشكر كل اللي شجعني اعمل بلوج
وياريت يعجبكوا
عشان بس نتعرف
انا مصري
دكتور(لسه بيدرس)
20سنه
اعزب
ويقدس الحياه الزوجيه
ويشارك في الاثاث
لو عن شخصيتي
ما أقدرش افيدكوا كتير
بس غالبا مفرفش
ومروق
بس ساعات بقلق جدا(غالبا وقت الامتحانات)
مش عاطفي اوي
بميل للعقلانيه اكتر
يعني واي حاجه تانيه اكيد هتبان
م خلال كتاباتي

هنا هنتكلم جد شويه
وضحك شويه
وشويه حاجات تانيه
وربنا يسهل ويعجبكوا اللي بنقدمه

ولو حضرتك ماعجبكش

انزل واسأل حضرتك

مش هتلاقي زي اسعارنا

والكواليتي عندنا جامده برضه

الكوانتيتي .....مش عارف

بس ان شاء الله تلاقوا حاجه حلوه